Dentro das fichas do inventario do patrimonio atópase unha serie adicada ao mundo do mar na que, xunto ás embarcacións tradicionais e os aparellos de pesca, podemos ver outras interesantes como a relativa a roupa de augas dos mariñeiros. Se a partir dos anos 50 impuxéronse as roupas de materiais sintéticos e as botas de goma, o certo é que desde mediados do século XIX os lenzos impregnados en aceite de liñaza e as botas con solas de madeira eran o predominante. Feitas polas mulleres dos mariñeiros e as botas por zapateiros, estas vestimentas polo seu custo eran empregadas soamente cando facía mal tempo ou mala mar pois, do contrario, os mariñeiros facían as faenas do mar descalzos e con farrapos vellos.
Arquivo de Galicia (Santiago de Compostela). Xunta de Galicia. Cultura. Inventario do Patrimonio Etnográfico. G85005-42.