DIA INTERNACIONAL DOS ARQUIVOS NO ARQUIVO HISTORICO PROVINCIAL DE LUGO
Para celebrar o día internacional dos arquivos, o Arquivo Histórico Provincial de Lugo inaugura hoxe unha exposición titulada: “Urbanismo en Lugo, 1917 -1970”, na que se mostrará unha escolma de documentos ilustrativos da evolución da cidade neste período.
A exposición, estrutúrase en 4 seccións: As rúas, As dotacións, As vivendas e A actividade económica. A primeira fai referencia á urbanización, e ao crecemento urbano, planificado ou non, mostrando cambios nas rúas xa existentes, as de nova creación e as abertas seguindo un proxecto de crecemento planificado.
A segunda refírese aos servizos que vai adquirindo a cidade: sanitarios, centros de ensino, mercados, instalacións para o ocio e outras dotacións, desde alumeados públicos, pasando pola depuradora de augas, á instalación dunha central telefónica, oficina de turismo, bancos, caixas de aforro....
Na terceira, referimos, por un lado a reforma, ampliación e mellora das vivendas antigas, que dotan de dinamismo as zonas tradicionais de habitación da cidade, e por outro, mostramos o crecemento e a ocupación do solo con novas construcións, estendéndose por novas zonas de ocupación que van ampliando o territorio que ocupa a cidade.
Por último mostramos a puxanza económica dunha cidade en expansión a través das actividades produtivas, tanto a través da instalación e ampliación de importantes industrias, como do florecente comercio, o auxe dos transportes ou da hostalería e outros negocios para o ocio.